Universidade e Concello estudan unha posible candidatura de Pontevedra como Cidade Creativa da Unesco

Creada en 2004, co obxectivo de promover a cooperación entre cidades que identifiquen a creatividade como un factor estratéxico de desenvolvemento urbano sostible, a Rede de Cidades Creativas da Unesco está integrada por preto de 250 urbes de diferentes partes do mundo. Analizar vías de colaboración para unha posible candidatura coa que Pontevedra poida optar a formar parte desta rede foi o obxectivo central da xuntanza que mantiveron o alcalde, Miguel Anxo Fernández Lores, e a vicerreitora do campus, Eva María Lantarón. Neste encontro, que tivo lugar o pasado venres e que tiña como obxectivo dar os primeiros pasos á hora de estudar a posibilidade de entrar a formar parte deste rede internacional, participaron tamén o concelleiro de Educación, Demetrio Gómez; a directora de Área do Campus de Especialización Crea, Ana Belén Fernández Souto, e o director de área adxunto á vicerreitoría, Luis Torres.

“É unha proposta que esperta interese polas dúas partes”, recoñece Fernández Souto, que incide en que trátase dunha iniciativa “que entronca directamente co Campus Crea e coas titulacións que se imparten na cidade, así como coa súa propia actividade cultural”. De aí que neste encontro trasladasen aos responsables municipais que “a Universidade colaborará en todo o necesario” nos traballos de preparación dunha candidatura, “que é unha petición que terá que efectuar o Concello”.

Once cidades españolas, ningunha delas galega, integran a día de hoxe esta Rede de Cidades Creativas, que ten como obxectivo “posicionar a creatividade e as industrias culturais no centro do seu plan de desenvolvemento local e cooperar activamente a nivel internacional na materia”, segundo recolle a súa web. A rede cubre sete ámbitos creativos: artesanía e artes populares, artes dixitais, cinema, deseño, gastronomía, literatura e música, de entre os que debe escollerse un para a definición desa candidatura, na que debe presentarse tamén un plan de acción de catro anos.