Entre o martes 22 e o martes 29, instalaranse nos accesos ás diferentes facultades e escolas do campus os postos de presentación do programa Falamos, dirixidos a dar a coñecer entre o alumnado as actividades inseridas nesta iniciativa dirixida a promover o uso do galego entre o estudantado universitario, que impulsan a Universidade de Vigo e o Concello de Pontevedra.

En horario de 10.00 a 13.00 e de 16.00 a 19.00 horas, estes postos situaranse o martes 22 nos accesos de Ciencias Sociais e da Comunicación e Belas Artes; o mércores 23, ante a Escola de Enxeñaría Forestal e a Escola de Enfermaría; e o xoves 24, ante CCSS e da Comunicación, Fisioterapia e Ciencias da Educación e do Deporte. Xa a vindeira semana, o luns 28 retornarán á EE Forestal e a Belas Artes e o martes 29 instalaranse nos accesos da Vicerreitoría do campus e das facultades de Ciencias da Educación e do Deporte e Fisioterapia.