Formación para o emprego

Como non só a adecuación das candidaturas aos perfiles profesionais demandados inflúe no éxito do proceso de inserción, senón que a habilidade cara a busca de emprego tamén o facilita, na Unidade de Emprego e Emprendemento organizamos accións formativas para promover a aprendizaxe e o desenvolvemento desas habilidades.

Directivos e directivas por un día

Co obxectivo de poñer en valor a función directiva no ámbito universitario e contribuír ao desenvolvemento profesional de estudantes de titulacións vencelladas a este eido, a Asociación Española de Directivos e a Fundación Junior Achievement, en colaboración coa Universidade de Vigo e co apoio de Deloitte, poñen marcha a iniciativa Directivos e Directivas por un Día.

Trátase dunha oportunidade para as mozas e mozos universitarios de acompañar unha directiva ou directivo de empresas da nosa contorna durante a súa xornada laboral.

A experiencia desenvolverase entre outubro e decembro e para as persoas seleccionadas será un xeito de achegarse á realidade do mundo laboral, afondar na función dos postos directivos e de seren orientadas no desenvolvemento das habilidades e competencias necesarias para dar con éxito os primeiros pasos da súa carreira profesional.

• Convocatoria
• Formulario de inscrición

Xornadas o Talento Feminino SUMA

A Área de Emprego e Emprendemento da Universidade de Vigo, en colaboración co Instituto da Muller e a Igualdade de Oportunidades, organiza o vindeiro 24 de setembro a segunda edición das xornadas o Talento Feminino SUMA  para xerar unha conciencia social que prime as capacidades e as habilidades profesionais para o acceso ao emprego das mulleres, a través da promoción da diversidade, a competitividade e a sostibilidade das empresas e as institucións.

• Programa
• Formulario de inscrición