Programas destacados

Todas as vantaxes, un só abono. O abono mUVer dáche acceso ás nosas salas cardiofitness, a múltiples actividades dirixidas, ás pistas de tenis e de atletismo... E, por se fora pouco, inclúe descontos nas escolas deportivas e nas actividades no medio natural. 

ABONO MUVER

Nas nosas salas cardio-fitness temos todo o preciso para que manteñas a forma. Contamos con instalacións abertas dende a primeira hora da mañá e durante toda a xornada, sempre coa presenza de persoal técnico cualificados que te axudará a acadar os teus obxectivos.

Poderás contar con programas de adestramento individualizado e avaliacións periódicas da mellora da túa condición física.

Ademais, se dispós do Abono mUVer, poderás asistir de forma gratuíta a un amplo abano de actividades, como: HIIT, core, ioga ou pilates (consulta a oferta por campus).

Servizos de fitness

 A Universidade de Vigo ofrece a posibilidade de aprender diferentes modalidades deportivas a través do seu programa Escolas Deportivas así como practicar por libre nas instalacións propias da universidade (o aluguer é de balde para a comunidade universitaria).

Escolas Deportivas

As Ligas Internas responden ao interese pola competición en deportes de equipo, ao tempo que se fomentan valores como a deportividade e o compañeirismo. 
Poden participar equipos integrados por persoas pertencentes á comunidade universitaria da Uvigo e existe tamén unha bolsa de xogadores/as para quen busque un grupo no que integrarse.
As modalidades de competición son: baloncesto mixto, balonmán (masculino e feminino), fútbol 7 mixto, fútbol sala (masculino e feminino), rugby 7 (masculino e feminino), tenis mixto (só no campus de Vigo) e voleibol mixto.
O regulamento inclúe un sistema de puntuación fair play que promove o xogo limpo e ten en conta o comportamento antideportivo.

Ligas universitarias

O programa específico de actividades no medio acuático inclúe dúas quendas, unha en outono e outra en primavera. Mediante estas actividades a comunidade universitaria ten a oportunidade de gozar, durante un día, de deportes no medio acuático en condicións moi vantaxosas. Aos tradicionais descenso de rápidos (rafting), surf, windsurf, caiak+andaina+snorkel e flyboard, engádense as actividades de wakeboard e de mergullo.  

AUGAVENTURA

 Ao longo de todo o curso organizamos rutas de sendeirismo con diversos niveis de dificultade. Están dirixidas a todas aquelas persoas interesadas tanto no exercicio físico en si como no coñecemento do noso patrimonio natural e arqueolóxico. En moitos dos casos finalizan con actividades de tipo cultural, lúdico ou gastronómico, como un magosto. Estes percorridos, deseñados orixinariamente para a comunidade universitaria, amplíanse ao público en xeral no caso de que non se cubran a totalidade das prazas. Ademais, facilitamos un autobús que traslada as persoas participantes desde os campus de orixe ata o lugar de saída e de regreso.

RUTAS CULTURAIS

ExploraCampus é unha iniciativa que ofrece actividades e recursos para a práctica deportiva ao aire libre na contorna dos campus de Vigo e Pontevedra. Este programa específico, que se desenvolverá con periodicidade mensual, abrangue actividades como rutas a pé, rutas en bicicleta, xeocaching, orientación, carreiras de montaña e quedadas running, entre outras.

EXPLORACAMPUS