Vicerreitoría de Planificación e Sostibilidade

Félix Quintero Martínez é profesor titular de universidade na UVigo, onde obtivo o seu título de Enxeñeiro Industrial (especialización en mecánica) en 1999 e o seu doutoramento en 2004. 

A súa tese, sobre corte por láser de cerámica avanzada, foi galardoada co Premio Extraordinario de Doutoramento da Universidade de Vigo e o accésit no Premio Nacional de Investigación Juan Artieda de teses doutorais, outorgado pola Asociación para a Investigación e Desenvolvemento Industrial dos Recursos Naturais (AITEMIN). 

En 2005 obtivo unha bolsa Marie Curie Outgoing International Fellowship para investigadores posdoutorais para traballar na produción de nanofibras de vidro bioactivas producidas mediante a técnica de laser spinning. Realizou parte deste proxecto como científico visitante na Rutgers University, entre 2006 e 2007. Tamén realizou estadías como científico visitante no Imperial College of London e na Universidade do Minho. 

É coinventor da técnica patentada de laser spinning para a produción de nanofibras de vidro así como do único método coñecido para a produción ininterrompida de nanofibras de vidro continuas a partir dun fundido (Cofiblas), un procedemento protexido por unha patente triádica concedida polas oficinas de patentes española (2018), europea (2020), xaponesa (2021) e estadounidense (2024). 

A súa actividade investigadora centrouse principalmente no procesamento con láser de cerámicas e vidros, e especialmente na produción de nanofibras de vidro, con maior énfase nas súas aplicacións como biomateriais. Actualmente está principalmente interesado en desenvolver as aplicacións da técnica Cofiblas para a produción de nanofibras de vidro con propiedades mecánicas sobresaíntes para aplicacións estruturais.

É coautor de máis de 70 artigos de investigación indexados no JCR, 38 deles no primeiro cuartil (Q1) e 16 no primeiro decil (D1). É coinventor de 15 patentes españolas e de seis internacionais. Participou en máis de 20 proxectos de investigación de financiamento público e concorrencia competitiva de ámbito internacional, nacional e autonómico. Tamén participou en máis de 20 contratos de investigación e innovación con empresas. Actualmente conta con tres sexenios de investigación e codirixe dúas teses doutorais.

É membro do Comité Técnico TC28: Glass fibres for reinforcement and insulation da International Comission on Glass.
 

• As relativas á programación, supervisión e execución das novas infraestruturas, así como a reforma, remodelación, adaptación ou reparación das xa existentes, en coordinación coa Xerencia.
• As correspondentes ás actuacións urbanísticas que afecten a Universidade de Vigo.
• As relacionadas con plans, proxectos e programas estratéxicos institucionais.
• As correspondentes á solicitude e á contratación de proxectos, infraestruturas, equipamentos e instalacións de carácter institucional.
• As de xestión e coordinación dos equipamentos e infraestruturas docentes.
• As relativas á posta en marcha de programas de sustentabilidade enerxética e ambiental.
• As relativas ás tecnoloxías da información e as comunicacións e os seus servizos.
• A definición, execución e supervisión da política de prevención de riscos laborais.
• A planificación e a coordinación das actividades de implantación e desenvolvemento da administración electrónica, de acordo coa Secretaría Xeral.
• As relacionadas coa Fundación Universidade de Vigo (Fuvi).
• As referidas á convocatoria de bolsas propias no ámbito das competencias delegadas nos puntos anteriores e os seus procedementos derivados.

• Coordinar e supervisar as actividades das unidades técnicas da universidade.
• Colaborar na elaboración e no seguimento dos plans urbanísticos e na xeración de nova infraestrutura nos campus universitarios.
• Propoñer os plans de mantemento e xestión das infraestruturas civís.
• Apoiar e participar na elaboración de plans, informes e todo tipo de documentos técnicos e administrativos, tanto no ámbito interno coma externo á universidade.

• Planeamento de infraestruturas e de instalacións.
• Seguimento de execución de obras.
• Mantemento de edificios.
• Atención a usuarios e usuarias.

• Estudar propostas de instalacións para a mellora docente.
• Seguimento e avaliación de instalacións e equipamentos docentes comúns.
• Seguimento e avaliación de instalacións e equipamento para o estudo e o traballo do estudantado

• Elaboración e posta en marcha do plan de radon na UVigo: planificación das medicións, avaliación dos datos e, se procede, proposta de medidas de corrección e de mitigación.
• Avaliación da calidade ambiental nos campus universitarios atendendo a aspectos vencellados cos mananciais e cos terreos.

• Asesoramento na xestión académica para a implantación da plataforma Sigma Academic.
• Asesoramento continuo ás unidades dos centros docentes e aos servizos centrais sobre a funcionalidade e a operatividade da plataforma Sigma Academic.
• Asesoramento ás vicerreitorías relacionadas coa actividade académica da universidade.
• Asesoramento na integración da plataforma Sigma Academic nas actividades da universidade.
• Seguimento das incidencias e das súas solucións.

• Dirixir a Oficina de Medio Ambiente.

• Seguimento e avaliación da xeración renovable e dos consumos enerxéticos da UVigo.
• Estudo de propostas de eficiencia enerxética na UVigo.
• Seguimento dos prezos do mercado eléctrico.
• Estudos de novas propostas de aproveitamentos renovables na UVigo.

Eugenia María Rodríguez González
Secretaría
+34 986 813 440
vicplan@uvigo.gal