Día Mundial das Persoas Doadoras de Sangue

Cada 14 de xuño celébrase o Día Mundial das Persoas Doadoras de Sangue, unha iniciativa promovida pola Organización Mundial da Saúde que constitúe unha oportunidade para crear conciencia sobre a importancia da doazón de sangue e agradecer o papel vital que desenvolven as persoas doadoras na saúde e no benestar da sociedade.

A doazón de sangue é un acto xeneroso que salva vidas. O sangue e os seus compoñentes son esenciais para realizar transfusións en situacións de emerxencia, cirurxías, tratamentos médicos e enfermidades crónicas. Alén diso, a doazón de sangue é fundamental para investigacións médicas e avances científicos.

Neste día é importante recoñecer e dar as grazas a quen doa sangue de maneira desinteresada. A súa valiosa contribución salva vidas e dá esperanza ás persoas que se enfrontan a situacións médicas difíciles. Tamén é un recordatorio para as persoas que aínda non doaron, para que se animen a realizar esta valiosa achega. Se nos xuntamos, podemos marcar a diferenza e axudar a construír un mundo máis saudable e solidario.

A Universidade de Vigo colabora anualmente coa Axencia Galega de Sangue, Órganos e Tecidos (ADOS) para establecer estratexias e campañas que fomenten a doazón altruísta por parte da comunidade universitaria, tanto de sangue como de órganos e de medula ósea.

Hoxe, 14 de xuño, as unidades móbiles de doazón de sangue estarán situadas nos seguintes lugares:

• Vigo: Centro Comercial Travesía de Vigo, de 10:00 a 14:30 e de 15:30 a 21:00 h  
• Pontevedra: Zona da Ferraría, de 9:30 a 14:30 h e de 15.30 a 21:00 h
• Ourense: Praza Maior de Celanova, de 10:00 a 14:00 e de 16:00 a 21:00 h

Se queres doar, podes consultar as localizacións e as datas premendo na web de ADOS.