A Casa das Campás acolle a exposición Educación en Crise. O sector educativo contemporáneo en crise, promovida por nove estudantes do máster en Arte Contemporánea. Creación e Investigación da Facultade de Belas Artes.

A exposición que ata o 22 de febreiro poderá visitarse na sede da Vicerreitoría do campus reflexiona sobre a situación da educación pública a día de hoxe e sobre como "un dos danos colaterais da crise foron os recortes sufridos no sector do sistema educativo", segundo salientan as e os impulsores dunha exposición enmarcada nas actividades da materia Proxectos expositivos, que imparte o profesor Xosé Manuel Buxán e na que reúnen unha serie de obras "que pretenden ofrecer unha visión dende dentro dese proceso de desmantelamento da educación pública ao que estamos asistindo na actualidade", sinalan.